Intervista

Etter framsyninga av Intervista under Cannes-festivalen i 1987 varte den ståande applausen ein halv time. Truleg trengte publikum tida til å tenkje over kva dei hadde sett. Fellini kunne ikkje dy seg, og laga ein film om det å lage film med endå fleire lag enn 8 ½ . Likevel insisterte han på å gje filmen merkelappen «filmetto», liten film. Med det meiner han at Intervista er ein upretensiøs og intim hyllest til den gruppa filmskaparar han sjølv tilhøyrer, dei som bruker film som eit personleg og kunstnarisk uttrykk, og som er minimalistiske i effektbruk. Fellini såg med gru på det stadig aukande fokuset på teknologiske nyvinningar og spesialeffektar. Intervista handlar om filmmediets unike potensiale til gjennom lyseksponering av film å skape liv frå grunnen av. Ingen stad på jorda gav Fellini større glede og inspirasjon til å skape enn ved filmstudioa i Cinecittà. Filmen er ein gedigen hyllest til nettopp denne staden og menneska der.